Ытти пайӗсене кунта тупма пулать.

Вӑраххӑн ҫитрӗ йывӑр вӑхӑт,
Хӑрушӑлӑх тӑрать умра.
Тӑшман ытла та юншӑн сӑхӑ —
Тӑрать тискеррӗн вӑл ҫумра.
Ҫара алпа тухаймӑн хирӗҫ.
Апла пулсассӑн парӑнас,
Е ҫул ҫинчен халь пӑрӑнас?
Пуҫра пӗр шухӑш: ватӗҫ, сирӗҫ,
Сунарҫӑсем пек хупӑрланӑ,
Ҫул урлӑ ҫакнӑ шӑнкӑрав:
Ҫав Михельсон пит хӑваланӑ,
Йӗрне ӳкернӗ Панин граф.

...Мал енӗ шурчӗ; Алтӑр ҫӑлтӑр
Ҫӗре шыв тӑкрӗ ӳпӗнсе.
Тумлатрӗ ҫумӑр чӑлтӑр-чӑлтӑр —
Ҫаран нӳрленчӗ йӗпенсе.
Пӗр сас та ҫук; ҫӑра юманлӑх
Ир умӗн лӑпкӑн тӗлӗрет.
Шырланлӑ вар та уҫӑ янлӑх
Ир сассипе кӑшт ӗнерет.
Тӳлек те шӑп, анчах та чӑтлӑх
Мӑкӑртатать пек ҫур саспа.
Кунта такамшӑн пулнӑ хӑтлӑх:
Ҫӳпленнӗ вырӑн турпаспа.

Кавруҫ ҫӳренӗ каллӗ-маллӗ, —
Канман-мӗн ҫӗрӗпе сукмак, —
Хускалнӑ ӑс пин пӑт чул аллӗ
Ахах пӗрчисене тупма:
Нумай вӗрсе, ҫапса алларӗ,
Тасатрӗ, пӑхрӗ уйӑрса.
Пуҫтарчӗ, тӑкрӗ, сапапарӗ,
Ҫӗр хут суйларӗ сӑвӑрса.
Пӗр ӑс тумлам; вӑл кӗҫ типет.
Пӗр тумлампа ҫеҫ кӳлӗ тумӑр,
Анчах та халӑх ӑсӗ — ҫумӑр.
Вӑл ҫуратать те, вӑл сиплет.

«Мӗн тумалла, — тет вӑл, — пӗлместӗп,
Ӑспа ниме те тӗллейместӗп.
Те пуҫ каска пек хӑвӑлланнӑ
Те кӑкӑрта тем тӑлӑланнӑ? —
Тӑрать ӑшра чун пусӑрнса,
Ӑна касса ыраттарать пек. —
Тахҫантанпа туяп: пырать пек
Ман мӗскӗн пурнӑҫ юхӑнса.
Хӑш чух шутлатӑп савӑнсан та:
Ытла юлхав-тӑр ман шӑпа.
Тепле ӑна хӑваласан та,
Ҫук, васкатаймӑн пушӑпа».

Хӑйне мӗн пусмӑрланине
Кавруҫ, ак, куҫ умне кӑларчӗ;
Пӗччен ларса хурланнине
Асра виҫме анчах хӑварчӗ.
«Кама хам ӗмӗтӗм ҫинчен
Шанса калам — вӗри чун кантӑр.
Каясчӗ тусӑмпа инҫе —
Пулни-иртнисене ӑс мантӑр.
Чечек! Вӑл ҫӑлтӑр... Яланах
Куҫ умӗнче тӑрать сӳнмесӗр.
Ас илейместӗп ҫӳҫенмесӗр —
Чӗре чӗнет, шырать ҫавнах».