Чӑваш чӗлхи пунктуацийӗн тӗп правилисен пайӗ.

85§. Цитатӑна (уйрӑм сӑмах-и вӑл, сӑмах майлашӗвӗ-и, предложени-и е унран та пысӑкрах сыпӑк) кавычка ӑшне хупаҫҫӗ. Уйрӑм предложенирен е темиҫе предложенирен тӑракан цитатӑна автор сӑмахӗсем ҫумӗнче тӑнӑ чух чарӑну паллисемпе тӳрӗ пуплев пекех йӗркелеҫҫӗ, сӑмахран: Тӑван чӗлхе пуласлӑхне ҫирӗп шанса Ҫеҫпӗл Мишши ҫапла каланӑ: «Хӗрлӗ хӗрнӗ хурҫӑ, ҫунтаркан ҫиҫӗм, вӗри вутлӑ ҫулӑм эсӗ пулӑн ху».

86§. Хӑнӑхман пӗлтерӗшлӗ е тӑрӑхласа калакан сӑмахсене, пуҫласа усӑ куракан сӑмахсене кавычкӑна хупаҫҫӗ, тӗслӗхрен: «Тетӗн» хӳри вӑрӑм тет (Ваттисен сӑмахӗ).

87§. Хаҫат-журнал, кӗнеке, кинофильм, учреждени ячӗсене тата ытти ҫавӗн йышши пайӑр ятсене кавычкӑна хупаҫҫӗ, сӑмахран: «Нарспи» поэма кӑҫал китайла пичетленсе тухнӑ.