Паян, малтанхи ытти ҫулсенчи пекех, И.Я. Яковлев палӑкӗ умӗнче халӑх митинга пухӑнчӗ. Сӑлтавӗ паллӑ — чӑваш чӗлхи кунӗ тата И.Я. Яковлевӑн ҫуралнӑ кунӗ.

Вӗренӳпе ҫамрӑксен политикин тата Культура, национальноҫсен ӗҫӗсен, информаци политикипе архив ӗҫӗн министерствисенчен, Шупшкарти аслӑ вӗренӳ заведенийӗсенчи чӑваш филологи факультечӗсенчен, Чӑваш наци конгресӗнчен салам сӑмахӗсем каларӗҫ. Унсӑр пуҫне халӑха «Шуҫӑм» ансамбль тата шкулсенчи ачасен пултарулӑх ушкӑнӗсем юрӑ-ташӑпа савӑнтарчӗҫ, сӑвӑ вуласа пачӗҫ.

Пӗлтӗр ку вӑхӑтра наци радиовӗ ӗҫлеме тытӑннӑччӗ — халӑх пухӑнӑвӗнче ытларах ун пирки калаҫатчӗҫ, кӑҫӑл вара ҫитес халӑх ҫырӑвӗ пирки пуплерӗҫ — пурне те чӑваш ятпа ҫырӑнма чӗнсе каларӗҫ, «сӑвар», «анатри» халӑхсене палӑртсан пӑтрану ҫеҫ кӗртӗҫ тесе пӗлтерчӗҫ. Ачисене, мӑнукӗсене чӑваш ятпа ҫыртарма вӑтанма хушмарӗҫ. Пухӑва килнӗ ачасене вара ашшӗ-амӑшӗсене хӑйсене чӑваш ятпа ҫыртарма ыйтӑр (14 ҫула ҫитиччен ашшӗ-амӑшӗ кӑмӑлӗ-ҫке) терӗҫ.

Мана ку пухӑва чӑвашла пӗлменнисем те килни савӑнтарчӗ — сӑмах калакансене ӑнланас тесе ушкӑнпа вырӑсла куҫарса тӑчӗҫ. «Тӗрлӗ-тӗрлӗ» сӑмахҫыхӑнӑвне аран куҫарнине хам хӑлхапа илтрӗм — малтан «тӗрӗ»-пе ҫыхӑнтарчӗҫ, кайран, ӑнланмалла пулса тухманнине кура, тӗрӗссине шыраса тупрӗҫех. Хула шкулӗнче чӑвашла ӑнланмалӑх вӗрентеҫех пулас. Чӑвашсен хушшинче ытларах чӑвашла калаҫсан ним мар калаҫса кайма пултараҫҫӗ.

Пуху вӗҫӗнче И.Я. Яковлев палӑкӗ умне чечексем хучӗҫ.

Сӑнӳкерчӗксем каярах пулӗҫ

#Чӑваш наци конгресӗ, #Чӑваш чӗлхи кунӗ, #митингсем, #чӑваш чӗлхи, #Шуҫӑм