Кӗҫнерникун, чӳкӗн 27-мӗшӗнче, Ҫеҫпӗл Мишши ҫуралнӑранпа 115 ҫул ҫитнине халалласа Чӑваш патшалӑх гуманитари ӑслӑлӑхӗсен институтӗнче «Чӑваша чӑваш чӗлхи кирлӗ» канашлу иртрӗ. Ӑна асӑннӑ институтпа вӗренӳ институчӗ, ЧНК тата ЧР учительсен ассоциацийӗ ҫумӗнчи чӑваш чӗлхипе литератури вӗрентекенсен секцийӗ йӗркеленӗ. Канашлӑва вӗренӳ министерствинчен Петрова Светлана Владимировна, ЧНК вице-президенчӗ Валерий Кламентьев ҫитнӗ.

Ку канашлура пӗтӗмӗшле илсен чӑваш чӗлхине шкулсенче тата ача пахчисенче вӗрентесси пирки калаҫрӗҫ. ФГОС тавра калаҫрӗҫ, чӑваш чӗлхин сехечӗсене мӗнле майпа чакармасӑр хӑварма пултарасси ҫинчен. Светлана Владимировна хӑйӗн сӑмахӗнче министерство ҫак ыйту ҫине мӗнле пӑхнине каласа пачӗ. Вӗсем имӗш шкулсене ФГОС панӑ 3-мӗш варианта йышӑнма сӗннӗ. Ку варианта наци республикисенче усӑ курмашкӑн тунӑ, анчах пӑтӑрмах ҫуратнӑ шкулсем темшӗн тепӗр вариантсене илнӗ пулать. Кӑна тӳрлетмелле иккен. Светлана Владимировна ҫавӑн пекех шкулсен уставӗсене ҫӗнетесси пирки каларӗ — унта вӗренӗве чӑвашла та ирттермелли пирки кӗртмелле имӗш. Вӗренӳ министрӗн ҫумӗ хӑйӗн сӑмахӗнче вӗренӳ пӗтӗмӗшле вырӑсла иртмелли пирки каларӗ, чӑвашли — чӑваш чӗлхи валли юлать. Пур предмета та чӑвашла пуҫламӑш классенче вӗрентесси вара наци шкулӗсенче кӑна пур иккен.

Светлана Владимировна наци шкулӗсене эрнере ултӑ кун вӗрентнинчен пилӗк кунлӑха куҫассине чарма, куҫнисене — сӑмах кунта Каҫал тӑрӑхӗнчи тата Элӗк районӗнчи шкулсем пирки пырать — каялла тавӑрма хушнӑ иккен. Ку сӑмаха пухӑннӑ халӑх тӑвӑллӑ алӑ ҫупса йышӑнчӗ. «Наци шкулӗсем пилӗк куна куҫма юрамасть. Элӗксене халь каларӑмӑр. Ҫӗнӗ 2015 ҫулта, январь уйӑхӗнчен, калле май ултӑ куна куҫӑр тесе. Пӗтӗм предметсемпе куҫмастӑр пулсассӑн — чӑваш чӗлхине шӑматкун вӗрентмелле, пӗтӗм сехечӗсене калле май тавӑрмалла тесе. Ку пулӑм урӑх ан пултӑр», — терӗ министр ҫумӗ халӑх умӗнче.

Владимир Клементьев хӑй сӑмахӗнче ЧНК Уставӗнче чӑваш чӗлхине хӳтӗлесси тӗп тӗллевӗ пулни пирки каларӗ. Вӑл Казахстанри тӗслех пирки каласа пачӗ — унта чӑваш чӗлхине ачасем эрнере 4 сехет вӗренеҫҫӗ иккен. Тепӗр тӗслӗх — Тутарстан. Кунта чӑваш чӗлхине эрнере 5 сехет вӗрентеҫҫӗ. Пӗлме: пирӗн тӑван республикӑра 3 сехет ҫеҫ. Валерий Клементьев чӑваш чӗлхине ача пахчинченех вӗрентме пуҫласси пирки калаҫусем пуҫармалли пирки, чӑвашла вӗрентӗве чӗлхене вӗрентнӗ чухне кӑна мар, ытти уроксенче те — сӑмахран физкультурӑра — анлӑлатмалли пирки калаҫрӗ.

Канашлӑвӑн тулли вариантне «Сӑвар ТВ» инҫет телеканалта паллашма пулать.

#Казахстан, #ЧПГӐИ, #ЧНК, #Элӗк районӗ, #чӑваш чӗлхи, #конференцисем, #канашлусем, #Тутарстан