Паян, ҫӗртмен 24-мӗшӗнче, Чӑваш Республикинче уяв — Республика кунӗ. Ӑна 1995 ҫулта, Чӑваш Республикине туса хунӑранпа 75 ҫул ҫитнӗ ятпа йӗркеленӗ. 2000 ҫулхи ҫу уйӑхӗн 4-мӗшӗнче вара Н.В. Фёдоров ку уява патшалӑх уявӗ шутне кӗртнӗ.

Кашни ҫул ҫак кун Чӑваш Ене Раҫҫейӗн тӗрлӗ регионӗсенчен, Раҫҫей тулашӗнчен нумай хӑна килет. Республика кунӗнче тӗрлӗ тӗслӗ мероприятисем иртеҫҫӗ — культура, экономика, спорт, савӑнӑҫ вӗсенче палӑрать.

Руспублика кунне халалланӑ чи пысӑк мероприятийӗсем шутне «Раҫҫей ҫалкуҫӗ» (малтан «Атӑлҫи ҫалкуҫӗ» ятлӑ пулнӑ) фестиваль, «Регионсем — чикӗсене пӑхӑнмасӑр килӗштерсе ӗҫлесси» регионсен хушшинчи курав кӗреҫҫӗ. Ҫавӑн пекех 23 сехетре фейерверк иртереҫҫӗ.

Кашни ҫул Республика кунне тӗрлӗ районсенче палӑртаҫҫӗ — кӑҫал ҫак тивӗҫ Шупашкар хулипе Вӑрмар районне лекнӗ. Вӑрмар районне илес пулсан кунта паян ҫакӑн пек мероприятисем иртӗҫ:

* «Тӗрлӗ тӗслӗ палитра» (Раҫҫей Федерацийӗн ха­лӑх художникӗн Ревель Федоровӑн, Чӑваш Республикин тава тивӗҫлӗ ӳнерҫин Николай Садюковӑн картинисен куравӗ)

* Энӗшпуҫӗнче пӗтӗмӗшле практика (ҫемье) вра­чӗн уйрӑмне уҫни

* велоспорт-маунтинбайк енӗпе ирт­те­рекен Раҫҫей Кубокӗн тапхӑрӗ, Чӑваш Ен Кубокӗн II тапхӑрӗ, Вӑрмар районӗн уҫӑ чемпио­начӗ тата ӑмӑртӑвӗ (Ара юханшыв хӗрри)

* «Ырӑ кун, тӑван ен» (Вӑрмар районӗнчи пултарулӑх коллективӗсен уяв концерчӗ).

Кӑҫалхи тепӗр уйрӑмлӑх — «Раҫҫей ҫӑлкуҫӗсем» уявне хутшӑнакансем яланхи пек Шупашкар урамӗ тӑрӑх утса тухмӗҫ — ун вырӑнне Шупашкарти 500 ҫуллӑх паркӗнче чӑваш Акатуйӗ иртӗ.

Ӑҫта мӗнле мероприятисем иртнипе эсир патшалӑх сайтӗнчи уяв страницинче паллашма пултаратӑр.

#Акатуй, #Республика кунӗ, #Шупашкар, #Вармар районӗ, #спорт, #экономика, #культура