Пуш уйӑхӗн пиллӗкмӗш, юлашки эрнинче Чӑваш халӑх сайчӗ ҫак хыпарсемпе паллаштарчӗ (вӗсене ытти чухнехи пекех чи нумай пӑхни тӑрӑх вырнаҫтарнӑ):

• «Ирӗклӗх» хастарӗсем Раҫҫей Федерацийӗн вӗренӳ министрӗ патне ҫыру яни пирки пӗлтертӗмӗр;

• Аксаковпа Николаев депутатсем камсемпе тӗл пулса калаҫни ҫинчен каласа патӑмӑр;

• Культура минстрӗн виҫҫӗмӗш ҫумӗ пулма кама лартнине пӗлме пултартӑр;

• Паян 85 ҫул тултарнӑ Владимир Агеев кӑкӑрӗ ҫине менле медаль ҫакни пирки хыпарларӑмӑр;

• «Чӗнтӗрлӗ чаршав» конкурсра кӑҫал кама чыслани ҫинчен каласа патӑмӑр;

• Чапаев палӑкӗ умне тухнӑ ҫынсене мӗншӗн тытса чарма пуҫланин вӑрттӑнлӑхне уҫрӑмӑр;

• Владимир Иванов педагогика университетне ертсе пырӗ-ши тесе пуҫа ватрӑмӑр;

• Нумай ачаллӑ ҫемьере 13-мӗш ача ҫут тӗнчене килни пирки хыпарларӑмӑр;

• Ҫӗнӗ Шупашкартан Шупашкара ҫула тухакансен нушине транспорт министрӗ тӗрӗслени пирки пӗлме пултартӑр;

• Пуҫа алебастр ӑшне чиксен мӗн пулни пирки ҫырса кӑтартрӑмӑр.

Ку эрнере ҫавӑн пекех эпир сире Вӑрнар ҫӗрӗнче ҫитӗнсе ӳснӗ ҫынпа Мурманск тӑрӑхӗнчи журнал мӗн сӑлтавпа кӑсӑкланни ҫинчен, Диана Харченко Шупашкар хулин чысне хӑш енчен хӳтӗлени пирки, 300 пин илнӗ тӳре-шара ҫинчен, пурӗ миҫе чиновник сӗтевпе ҫакланни ҫинчен тата пирӗн тӑрӑхра ҫӳлевӗҫсем нумайланни пирки хыпарларӑмӑр.

Яланхи пекех эрнене пӗтӗмлетсе унӑн ятне пӗлтеретпӗр. Пирӗн шутпа ӑна «Наци эпосӗнчи паттӑрсен аллейипе митинга тухнисен эрни» теме пулать.

#Вӑрнар районӗ, #сӗтев, #тӳре-шара, #Шупашкар, #митингсем, #депутатсем, #чӑвашлӑх, #пухусем, #культура, #Ирӗклӗх, #ҫырусем, #ачасем, #Мурманск, #эрне хыпарӗсем