Вилӗм яланах — кӑтмен инкек, ку тӗслӗхре вара — пушшех кӗтменрен те кӗтменни. Ҫывӑх ҫыннисем, ӗҫтешӗсем, ӑна юратнӑ, хисепленӗ ҫынсем ӗнер, ҫу уйӑхӗн 31-мӗшӗнче, Чӑваш Республикин тава тивӗҫлӗ артистне Николай Гордеева юлашки ҫула асатнӑ. «Хыпар» хаҫат паян ҫак хыпара пӗлтерчӗ.

Мӗн пулнӑ? Уҫӑмсӑрри пайтах. РФ Прокуратури ҫумӗнчи Следстви комитечӗн республикӑри Следстви управленийӗн ертӳҫин пулӗшуҫи Олег Дмитриев «Хыпар» корреспондентне пӗлтернӗ тӑрӑх, артист виллине иртнӗ шӑматкун ирхине Шупашкарти Ҫамрӑклӑх бульварӗнчи хӑй пурӑнакан ҫурт подъезчӗ умӗнче тупнӑ. Малтанлӑха палӑртнӑ тӑрӑх, вӑл подъездӑн 7-8-мӗш хутсен хушшинчи чӳречинчен хӑй сикнӗ (эпир пӗлнӗ тӑрӑх, Гордеевсен ҫемйи тӑваттӑмӗш хутра пурӑнать). Мӗншӗн ҫапла хӑтланнӑ — калама хӗн. Тӑванӗсем вӑл юлашки вӑхӑтра пусӑрӑнчӑк кӑмӑллӑ пулни, вилӗм пирки сӑмах пуҫаркалани ҫинчен каланӑ-мӗн.

Чӑннипех — пысӑк ҫухату. Н.Гордеев 1961 ҫулта Ҫӗрпӳ районӗнчи Вутлан ялӗнче ҫуралнӑ. 1983 ҫулта М.Щепкин ячӗллӗ театр училищин чӑваш студине пӗтерсе килнӗ, Чӑваш патшалӑх академи драма театрӗнче ӗҫлеме тытӑннӑ. Вӑл калӑплана сӑнарсене куракан хапӑл туса йышӑнатчӗ. Ҫулсем иртнӗ май вӑл театртан кайса бизнес енне сулӑнчӗ, ҫапах сценӑран та ютшӑнмарӗ: вӑл пӗччен, мӑшӑрӗпе юрлакан эстрада юррисене пурте кӑмӑлласа итлетчӗҫ.

Артиста ӗнер Ҫӗрпӳ районӗнче тӑван ялӗнче пытарнӑ.

#пӑтӑрмахсем, #Ҫӗрпӳ районӗ, #Шупашкар