Сивĕ!
Урамра мар... Ман чунăмра пит сивĕ!
Çанталăк сиввине пулать çĕнме
Ӳркенмесен кăвайт чĕртме!
Кайрăн!
Пĕлес килет... Епле кайма шут турăн
«Саватăп» тенине манса кайса,
«Сыв пул!» тесе куçран пăхса?
Юлтăм!
Мĕнех тăвас! Каях! тесе ал султăм...
Çунатлă кайăка епле чаран?
Халь каймасан — ыран каян...
Сивĕ!
Чĕре çунать... Çавах чуна пит сивĕ!
«Пĕр санăн» тенине епле манас?
Сансăр пуçне кама савас?..