Систермесĕр çур та çитрĕ, —
Юр куççульленет паян.
Юлашки хут çĕре витрĕ
Çӳхе утиялпалан.
Çурхи кун вăл — тавлашуллă, —
Хĕвел ăшшипе хĕртет.
Çурхи кăмăл — пăтрануллă, —
Çурçĕртен сив çил вĕрет.
Кураксем ытла ир килчĕç
Çуркуннене çул уçса.
Краклатса пĕр-пĕрне чĕнчĕç
Çĕнĕ йăва çавăрма.
Çуркунне васкавлăн çитрĕ, —
Кун куллен вăрăмланать.
Чĕрĕ чунăн ыйхă çĕтрĕ, —
Çут çанталăк тумланать.