Вера Кузьминана
Этемĕн чĕри — сцена.
Э. Дикинсон
Артист вăл—куçаруçă пек.
Пин тĕрлĕ çыннăн кăмăлне
кĕртет вăл ĕмĕр тăршшĕпех
хăй сăн-питне, ӳтне, чунне.
Çĕршер сăнар туса парать
кайран вăл çак асапĕнчен.
Поэма евĕр янăрать
ун ролĕ сцена тĕнчинчен.
Çав музыка тĕшши пулса
çунать шалтан пĕр тĕп Сăнар.
Ун хĕн-тертне сума суса
тăнлар... Сăмахсăр пуç таяр.
Трагеди сцени пек — чĕри! —
тахçан Эмили калашне.
Сăпайлă шăплăхра, юри
итлер — чĕрийĕн таппине.
Ун ĕçĕ — аслă, куçару:
ун вăйĕпе, ун таппипе
кĕрлет — ăсталăх, пултару
чăваш шăпин хавалĕпе.