Мăнкун иртсен тепĕр кун —
Тунтикун
Таса атте Ахванаççи,
Ун матăшки Анастаççи
Пулчĕç хăнара —
Ăшă сăрара.
— Хăритун!
Паян тунтикун, —
Терĕ пуп сăра хуçине
Выляткаласа куçсене.
— Çаплах, ара, çаплах,
Çветтуй атте,
Тыт-ха татах.
Ĕç ман килте, —
Терĕ Хĕритун алтăрпа
сăра парса,
Пуп çумне ларса.
Хĕритун арăмĕ Укçине
Пăхса илчĕ пуп çине.
Вăрттăн, куç айĕпе,
Пуçларĕ сăмах майĕпе:
— Ташласан та юрать те
Пĕрре,
Таса атте.
Хам ĕçтерем — тыт тепре.
Ĕçрĕç ĕçмеллех,
Ташăра вĕçмеллех.
Çӳçне-пуçне арпаштарса,
Пуп пуçларĕ ура хуçса:
— Эх, ну!
Эх, ну!
Унччен-кунччен, мăнкунччен,
Кукăль пиçсе тухиччен,
Хура халăх сисиччен
Пурăнар-ха виличчен.
Эх, ну!
Эх, ну!
Кăчăк туртса кăмăл ту!
Ура тапса ташă ту!
Çăвар карса юрă ту!
Эх, ну! Эх, ну!
Эпĕ сан йысну. —
Ячĕ пупăн çеммипе
Херитунĕ кĕслепе:
— Тĕнкĕлти-тĕнкĕлти кĕслеме
Ывăнмасăр хам калам,
Çакă çветтуй аттеме
Урайĕнче шутарам.
Шурĕ урай тăрăх çветтуй атте.
Эх, пулчĕ çав илемлĕ тетте!
Тепĕр кунне ирхине
Чанĕ чиркĕве чĕнет.
Утрĕ пуп та мухмăрла —
Ваттисене асăнмалла.
Пуçланчĕ кĕлĕ-поминани:
— Со святыми упокой,
Человек-то был такой,
Любил выпить каянни...
— Тпру, стой! — терĕ тиечук.
— Молодая жена! — пĕтерчĕ пуп.
Халăх пăлханчĕ.
Пуп та лăпланчĕ.
Тытăнчĕ пуп каллех асăнма
Хут çинчен вулама:
— Çимеона,
Иоанна,
Демьяна,
Емельяна,
Харитона,
Спиридона,
Тата
Титта....
Им-тата-та-та!
Тит-та та, та-та!
— Тпру, стой! — терĕ тиечук,
— Молодая жена! — терĕ пуп
Чарма пынă арăмне тытса,
Чуптуса.
Тĕнкĕлти-тĕнкĕлти,
Мĕкĕлти-мекĕлти,
Тĕнкки-тенкки,
Ӳсĕр пупа хăлха чикки.
Эх, ну-у!
Халăх чиркӳрен тух та шу.