Шутлă кунсем, тусăм, шутлă кунсем.
Каçса кайса киленетпĕр — пурнакансем.
Пурăнманнисем те пурăнаççĕ
пурнаканĕ пур чух — парăнмаççĕ.
Çутă кунсем, ачам, çутă кунсем.
Хура кунсем пулин, çутă вĕсем.
Нимĕн те çук лере, нимĕн-нимĕн.
Кайăн, часах кайăн, калла килмĕн.
Шутлă кунсем, ачам, шутлă кунсем.
Аван, ăслă çынсем — шутлакансем.
Шутламанни айван, ăсран тайлăк.
Эс ху кайăн, ачам, асран каймăн.
Шутлă кунсем, тусăм, шутлă кунсем.
Çуралсанах çапла, шутлă вĕсем.
Хастаррисем, çынсем, кулянмаççĕ,
шутлă, шутлă тесе каламаççĕ.
Шутлă кунсем, тусăм, шутлă кунсем.
Çывăрмасăр курнă тĕлĕк вĕсем.
Эпир, хастар марри, пур ухмахĕ,
ĕç ăнмарĕ, тетпĕр, ĕç тухмарĕ...