Ку чух хула урамĕнче куратăн
Ыйткалакан çине ыйткалакан.
Паян та акă урампа пыратăп, —
Ларать яка асфальт çинче такам.
Ача тытса ларать пĕччен хĕрарăм,
Хура пит-куçлăскер, сăнран чипер.
Ик-виçĕ вак укçа çеç асăрхарăм
Чĕрçи çинче, пăхса илсен çакскер.
Питне-куçне юрпа сапать çил хумĕ,
Ачи çинчи утиялне сирет.
Çӳхе те кивĕ унăн тумĕ-юмĕ,
Питех ансат каймашкăн чир-чĕре.
Чылайăш инкене асăрхамаççĕ,
Пăхмаççĕ çаврăнса ачи çине.
Хĕç пек çӳхе ыйткалакан хутаçĕ, —
Мĕскер кĕтет ыран мĕскĕнсене?
Пĕлместĕп эпĕ. Хуравне кам парĕ?
Кĕсье ман хамăн та çӳхе те-ха, —
Чăваш поэчĕ хăй те чухăн мар-и? —
Чунпа этем пулса юлни паха.
Асфальт çинчи хĕрарăмăн сăн-пичĕ
Пăртак çуталчĕ эпĕ чарăнсан.
Мĕн панине вăл пархатарлăн илчĕ,
Тасалтăм хам та çут сăнне курсан...
Трамвай килет. Пăртак ларса пырсассăн
Çĕн ушкăн кĕчĕ вирхĕнсе шала.
Чĕркуçленсе ларсах кăларчĕ сасă —
Ку пулчĕ тӳпеттейлĕ пĕр малай.
Ача куçĕсемпе мала тинкерчĕ,
Мăн çын пек, асăнса Аллах ятне,
Кĕлле пикенчĕ — пысăк мар-и терчĕ! —
Çӳрет çапла, шкула çӳрес чухне.
Çĕршыв — ыйткалакан... Мĕскер кĕтетпĕр?
Пĕтме çеç парас марччĕ пĕр-пĕрне.
Ыйткалакан пулса пырса кĕретпĕр
Виçпинлĕхĕн пĕрремĕш ĕмĕрне.
Ку килĕшет-и, çук-и — пирĕн Чăнлăх, —
Аркатрĕ тейĕн çĕршыда çĕмрен.
Этем чысне пĕрре ас тивнĕ халăх
Халь çĕкленес пулать ун çĕнĕрен.
22.01.2000