Куртăм сăнӳкерчĕк.
Вăл аса илтерчĕ
Сан çинчен мана.
Эс унта тăратăн,
Ман çине пăхатăн
Пăлхатса чуна.
Куллу ăшă, уçă:
Йăл! кулать сан куçă
Сăнӳкерчĕкре.
Эп çакна курсассăн
Хаш! сывларăм ассăн,
Чикрĕ яш! чĕре.
Мĕншĕн, ма тесессĕн,
Алăран-çке эсĕ
Тытнă теприне.
Ыталать сана вăл.
Чиктерет-çке çакă
Манăн чĕрене!
Кам хуравлĕ, калĕ:
Кам пулать вăл халĕ
Сан пурнăçунта?
Упăшку е каччă?
Пит тăрать-çке тачă
Вăл санпа кунта!
Курманни сана эп
Вăрах пулчĕ. Айăп
Пур кунта хамрах.
Юрĕ-ха, ӳкерчĕк
Курнăçма систерчĕ
Санпалан часрах.