Эпĕр питĕ телейсĕр çуралнă —
Аслă вăрçă пуçланнă çулта.
Аттесем çапăçу хирне кайнă —
Арçынсем сахалланнă ялта...
Аттесем вăрçăра парăнмарĕç —
Ăнланатпăр вĕсем тӳснине.
Аттесем вăрçăран таврăнмарĕç —
Пĕлеймерĕç эпир ӳснине.
Вăрçă шавĕ кĕрлерĕ те иртрĕ —
Арканмарĕ текех çирĕп мир.
Пуçсене шурă юрĕ те витрĕ —
Асатте те халь пулнă эпир.
Тахçанах пирĕнпе çук пулин те —
Манăçмаççĕ нихçан аттесем.
Нимле вăрçă ан курччăрччĕ ĕнтĕ
Паянхи ачасен ачисем!