Сана парнелерĕм самант,
Çĕнтерĕвĕм пулчĕ асаплă.
Пĕрмай çавăнпах асăма
Килет вăл юмах пек асамлăн.
Чечек-и ун чух? — çăлтăрсем
Ална тыттарайнă пек туйрăм.
Ытла та кĕтрет-çке парнем,
Тĕнче йăл кулать пире уйрăм.
Пурнатпăр эпир çĕр çинче.
Ав пирĕншĕн вăл та пытанчăк.
Мĕскершĕн этем чĕринче
Тĕнче евĕрлех хăш-пĕр шанчăк.
Пĕлетĕп эп: çав самантра
Чĕре туйăмпа хăвăрт тулчĕ.
Çав пĕчĕкçĕ вăхăт манра
Пит пысăк телей пулса юлчĕ.