Ăслă Айăр

Сар хĕвелĕ хĕртнипе

Хĕлĕн халĕ те хавшать.

Çурхи сывлăш хумĕпе

Чĕрĕ чун ачашланать.

Шур пĕркенчĕке сирсе,

Парăнтарса сив хĕле,

Ака уйăхĕ çитсен

Çитрĕ тăчĕ çуркунне.

Шăнкăравлă шыв юххи

Çырмасемпе варсенче.

Ăшă кунĕсем çитни

Савăнтарать тĕнчене.

Кайăк-кĕшĕк ушкăнпа,

Чĕвĕл-чĕвĕл сасăпа,

Вĕçсе килчĕ хаваспа,

Тулчĕ тавра юрăпа.

Чуна çĕклентерекен

Ешĕл тумлă çуркунне

Вăй илсе пынипеле

Ытарма çук илемне.

Тыткăнлать хăй ăшшипе,

Çу пекех ирĕлтерет.

Хӳхĕм тĕнче ытамне

Çиçĕмле туртса кĕртет.

Селĕм сăнлă таврара,

Ешĕлленннĕ улăхра,

Куç илейми çаранра,

Лаша кĕтĕвĕ çӳрет.

Тăпăр-тăпăр кĕлеткеллĕ

Ăйăрсем¹ те кĕсресем².

Хулăн-хулăн çилхемеслĕ³,

Мăнтăркка купарчисем.

Çирĕп тăлланăскерсем⁴,

Пуçĕсене чикнĕ те

Курăка каçса кайса⁵

Çиеççĕ çатăртаттарса.

Ирĕкри тихийĕсем

Ашшĕ-амăш çумĕнче

Пĕлмесĕр лăпкăлăха

Чупаççĕ хавхаланса.

Куç хупса ĕлкĕриччен⁶

Часах унта та кунта

Питĕ çăмăл чупăпа⁷

Çитме пултанрнă вĕсем.

Тимлĕ çинĕ вăхăтрах

Ĕлкĕреççĕ сăнама

Чун тĕпренчĕкĕсене⁸

Çиçкĕн⁹ те кĕсрийĕсем.

Ăйăрсем те час-часах

Пĕчĕккисем еннелле

Манмаççĕ куç ывăтма¹⁰,

Туяççĕ яваплăха¹¹.

Пĕр чăмăрта¹² çинипе,

Курăк сахалланнипе,

Вĕрентӳçĕ кĕçенсе

Урăх вырăна чĕнет.

Хайхи ĕçкĕç¹³, çав саспа,

Кĕтӳçĕ, йӳлехейскер¹⁴,

Ĕнчентен¹⁵ вăраннипе

Ячĕ вăйлă çухăрса.

Кĕтӳ тапăрне çак сас

Çитернĕ йăлăхтарса.

Кун пекки мĕншĕн тесен

Ĕсĕк¹⁶ пулнă çаплипех.

Хайхи кĕтӳç, мухмăрли,

Тăна кĕрсе¹⁷ çитиччен

Вĕрентӳçĕ, ушкăнри,

Пăрахмарĕ шухăшне.

Кĕçенсе, хăй чĕлхипе

Ячĕ çын пек калаçса:

— Кун ĕнтрĕкленийĕччен¹⁸,

Туссем, вăхăт чылай-ха.

Çинипе пĕр вырăнта

Хырăм тăранмĕ капла.

Сикер курăклă çĕре,

Пулар тутă çĕрĕпе.

Вĕрентӳçĕ сăмахне

Итленĕ янаварсем¹⁹

Хăйсен хӳтлĕхне²⁰ туйса

Çул тытнă²¹ ун хыççăнах.

Кĕтӳç, урмăш²² сассипе,

Кăвакал пек уттипе,

Çитрĕ-çитрех кĕтĕве,

Шаплаттарчĕ пушшипе.

Чĕн вĕçĕллĕ пушши

Лекрĕ капăр тихана.

Лешĕн, кĕçеннĕ сасси,

Янăрарĕ таврара.

Ăслă Айăр самантрах

Ăнланчĕ мĕн пулнине.

Хăлхине чăнк тăратса,

Васкарĕ кĕтӳç патне.

Тăлланă пулсассăн та

Сикрĕ пĕтĕм вăйĕпе.

Айăпсăра çапнипе

Килĕшмерĕ ниепле.

Сĕмсĕр²³, тăрри шăтăка²⁴,

Шутларĕ ăса кĕртме²⁵.

Çитрĕ, çыртрĕ ĕнсерен

Чĕлĕм хыпнă кĕтӳçе.

Хыçалти ури çине

Тăчĕ те тăрлавсăра²⁶

Пушă çавăрнă пекех

Пуç çинче вшик! тутарса

Çаврăм²⁷ туса илчĕ те

Вăрса ячĕ²⁸ тарăхса.

Кĕтӳç вĕçрĕ аякка

Таçта-таçта çитиех.

Лаша пăхакан патне

Ăйăр хыпаланчăкла²⁹

Персе çитнĕ-çитменех

Пуçăнчĕ ăнлантарма:

— Эпир чĕрĕ чунсемех.

Эсĕ те çав шутриех.

Çапсан сан та ыратать.

Ма çапатăн çамрăка?

Пĕр апата пĕтерсен

Эс пуçлатăн теприне.

Пĕр вырăнта çинипе

Курăк пĕтрĕ пирĕн те.

Урăх çĕре, çавăнпа,

Шутларăмăр: куçмалла.

Санăн çавна хăвăнах

Ăнланма тăрăшмалла.

— Ăхă, — теме çеç çăвар

Уçăлчĕ айăплавла³⁰.

Тӳсме çук ыратнипе

Нăйкăшрĕ вăл чылайччен…

Вĕрентӳçĕ кĕтӳçе

Лартрĕ çурăмĕ çине.

Ушкăн лаша çывăхне

Çитерчĕ пит ерипен.

Çавăн хыççăн кĕтӳçе

Тапăр³¹ курман мухмăрла.

Кулленех лашасене

Пăхнă питĕ тăрăшса.