Ан тив, тĕнче вĕç-хĕрсĕр пултăр,
пĕрех хисепсĕр çăлтăр хушшинче
пулсассăн эс пĕртен-пĕр çутă,
сана эп уйăратăп вĕсенчен.
Пĕлетĕп, асамçă — кибернетика,
«паллаççĕ» роботсем пиншер тĕсе.
Анчах та тутасем пăшăлтатаççĕ
«Сана ман пек нимскер туймасть» тесе.
Кашни çынна чĕнме ятсем паратпăр,
сăмах çитет пур курăк-чĕрчуна.
Мĕнпур сасран, темле япаларан та
ман уйăрса чĕнес килет сана.