Тĕнчене силлессĕн
Çил сикет çиллессĕн.
Юр юла пек вĕттĕн пĕтĕрнет.
Çул та çук – çухалчĕ,
Шиклĕх çеç çуралчĕ,
Çитрĕм мар-ши пурăнăç хĕрне?
… Пăрлă ӳт пĕçерчĕ,
Юр – йĕпе икерчĕ...
Ăш-чикре те ăшалать вутла.
Шур тĕтре, шур лĕпĕш,
Эх, епле шыв лĕпĕ.
Хывăнас пуль, пăчă-çке ытла.
Ку вăл – вилĕ кулă,
Эп чĕрех-ха,
Курăр!
Юн пăрланиччен кӳтем –
Вăй-хала шăмарăп,
Тĕлĕк курса мар эп,
Кĕрешсе вилем.
Эп – этем!
Шăл çыртса çул уçрăм,
Хырăмпа эп шуçрăм.
Курăр!
Çитрĕм хам çитес çĕре.
Пурăнăç!
Пĕрре эс,
Саншăн çеç кĕрешĕç
Вут-хĕлхемлĕ
Мĕльюншар чĕре.