Хальхи самана çеммисем йăлăхтарчĕç —
Иртен пуçласа каçченех параппан.
Тахçан шур вальс çаврăннă хĕр халĕ карчăк,
Çапах хăйĕн çамрăклăхне вăл манман.
Асра-ха: яш-кĕрĕм клуба пухăнсассăн,
Вальс кӳртĕмĕ çеç янрама тытăнсан,
Кĕтеттĕн, хăçан сарă каччă хавассăн
Хĕвел пек çиçсе пăхĕ сан куçунтан.
Ак вăйă карти пуçарать çăмăл ташă,
«Дунайские волны» илемлĕн юхать.
Сана, телейне тупнă евĕр, ачашшăн
Çинçе пилĕкрен кĕтнĕ çын ыталать.
Пĕрре-иккĕ-виççĕ, пĕрре-иккĕ-виççĕ —
Пурте ярăнса çаврăнаççĕ залра...
Ах, сӳнчĕ-çке çав йăлтăркка çутă çиçĕм,
Ах, юлчĕ-çке пĕр аслати пурнăçра.
Хальхи самана лăпкă мар ирĕн-каçăн —
Тăхлан, юн, куççуль, уйрăлу, çухату...
Анчах ват чуна пурăнма пулăшаççĕ —
Вальс, яшлăх тата малтанхи юрату.