Çĕрле. Атăл çийĕн
Яш тантăшсемпе
Аван çӳремешкĕн
Пĕрле кимĕпе.
Çӳлтен çутă уйăх
Йăвашшăн пăхать.
Çути ун шыв тăрăх
Чĕркĕмĕл суйлать.
Пыратпăр хăюллăн
Ишсе, малалла.
Çап-çутă йĕр хумлăн
Юлать хыçала.
Умра тĕкĕр евĕр
Шыв çийĕ яка.
Юхать аслă Атăл
Туллин, сарлакан.
Ун мăшăр çыранĕ
Пит капăр, пуян, —
Ем-ешĕл çаранĕ,
Илемлĕ вăрман.
Эх, Атăлăм, Атăл,
Саватăп сана,
Нихçан эс ан татăл, —
Ан сивĕт чуна.