Тăванран та тăван эс, хаçатăм,
Юратса ал паратăп сана!
Кун-çулра телей, сывлăх сунатăп,
Иксĕлми ирĕклĕх — сассуна.
Халиччен мухтава тивĕç пулнă
Яту сан янраса илтĕнет.
Яланах курăнатăн ятуллă,
Сăн-питӳ кăмăла илĕртет.
Шурăмпуç шуралса çĕкленет-и—
Сар хĕвел тухасса ирĕлсе!
Хĕвел пек сана хапăл кĕтетĕп
Кил умне çуталса килессе.
Тăван çĕр, Чăваш Ен те, Çĕршывăм
Уçăлать-и умра сарăлса —
Пурте халăх чун-чĕришĕн çывăх,
Вуласа савăнмашкăн ансат.
Камăн вăй-халĕнчен сăрхăнать вăл
Çавăн чухлĕ ăс-хакăл, тивлет?
Пĕрлехи ушкăнра çуралать вăй,
Чи хĕрӳллĕ хĕмпе çеç хĕрет.
Самана юрлăхне парăнмастăн,
Çемйӳнте - Турă панă хăват.
Çирĕппĕн, шанăçа çухатмасăр
Эс утатăн "Хыпарçăм", хаçат!