::Эконом

Эконом (ҫавӑн пекех Юпал) — Чӑваш Республикинчи Йӗпреҫ районӗнчи посёлок. Киров ял тӑрӑхне кӗрет.

Географи

Посёлок Чӑваш Енӗн тӗп пайӗнче Юпал юханшывӗн сылтӑм ҫыранӗнче вырнаҫнӑ. Республикӑн тӗп хулине — Шупашкара — ҫитме 126 километр, район центрне — Йӗпреҫ поселокне ҫитме — 17 километр, чи ҫывӑхри чукун ҫул станцийӗ таран — ҫавӑн пекех 17 километр.

Спотарӑпа Эконом хушшинчи уй Сурӑм уй ятлӑ.

Историйӗ

Посёлока 1927 ҫулта йӗркеленӗ. Малтанхи ячӗ — Юпал. 1926 ҫулхи ҫӑвӑн 4-мӗшӗнче кунта 1922 ҫултанпа ӗҫлекен «Узяново» ял хуҫалӑх эртелне туса хунӑ. 1927 ҫулта посёлока Етӗрне уесӗнчи Туҫа вулӑсӗнчен 13 кил хуҫалӑхӗ (63 ҫын) куҫса килнӗ.

1930 ҫулта «Эконом» колхоз йӗркеленӗ. Посёлокӑн хальхи ятне ҫак колхоз ячӗпе панӑ. Административлӑ-территориллӗ пайлану енӗпе посёлок 1926–1927 ҫулсенче Етӗрне уесӗнчи Туҫа вулӑсне, 1927–1928 тата 1962–1965 ҫулсенче Вӑрнар районне, 1928–1962 ҫулсенче тата 1965 ҫултанпа Йӗпреҫ районне кӗнӗ.

Халӑх йышӗ

Халӑх йышӗн улшӑнӑвӗ:

1926 ҫул — 6 кил, 13 арҫын, 6 хӗрарӑм.
1939 ҫул — 166 арҫын, 118 хӗрарӑм.
1979 ҫул — 143 арҫын, 160 хӗрарӑм.
2002 ҫул — 36 кил, 246 ҫын: 120 арҫын, 126 хӗрарӑм.
2010 ҫул — 77 уйрӑм хуҫалӑх, 254 ҫын: 130 арҫын, 124 хӗрарӑм.

Наци йышӗ: чӑвашсем, вырӑссем.

Инфраструктура

Посёлокра фельдшер пункчӗ, клуб, спорт площадки, икӗ лавкка пур.

Экономика

Экономикӑн тӗп пайне ял хуҫалӑхӗн производстви йышӑнать. Посёлок территорийӗнче Киров ячӗллӗ колхоз ӗҫлет.

Паллӑ ҫынсем

Григорьев Юрий Иванович (1943 ҫ.ҫ.), Чӑваш Республикин тава тивӗҫлӗ механизаторӗ.
Ильин Пётр Фёдорович (1936–2002), вӑрманҫӑ.
Исаков Алексей Тихонович (1916–2004), вӗрентекен, халӑх пултарулӑхне пухакан.
Мингалев Анатолий Николаевич (1956 ҫ.ҫ.), полковник, медицина ӑслӑлӑхӗсен докторӗ, аслӑ категорири тухтӑр, Раҫҫей Федерацийӗн тава тивӗҫлӗ аслӑ шкул ӗҫченӗ.
Михайлов Геннадий Павлович (1957 ҫ.ҫ.), механизатор.
Руссков Виталий Николаевич (1956 ҫ.ҫ.), производство йӗркелекенӗ.
Тихонов Андрей Тихонович (1939 ҫ.ҫ.), механизатор.
Юлмасов Николай Григорьевич (1949 ҫ.ҫ.), полковник.