Chuvash.Org :: Пичет версиӗ :: АхтанайАхтанай — Шупашкар районӗнчи ял, Шӗнерпуҫ ял тӑрӑхне кӗрет. Шупашкартан 21 ҫухрӑмра, Кӳкеҫрен 9 ҫухрӑмра ларать.
Яла малтан Пӗчӗк Пӳкасси тенӗ. Ӑна XIX ӗмӗрӗн пӗрремӗш ҫурринче Теней ӗмпӳ ӑраттинчен тухнӑ Ахтанай никӗсленӗ. Вӑл ҫӳрҫӗртерех ларакан Мӑн Пӳкассинчен тухнӑскер пулнӑ.
1866 ҫулччен патшалӑх хресченӗсем пулнӑ. Ҫӗр ӗҫӗпе ӗҫленӗ.
1931 ҫулта ялта Войков ячӗллӗ колхоз йӗркеленнӗ.
Районсене туса хуриччен Шупашкар уесӗн Йӑлӑмкас вулӑсне кӗнӗ. 1927 ҫулхи юпан 1-мӗшӗнче Шупашкар районне кӗртнӗ.
1897 ҫулта ку ялта 37 арҫын, 39 хӗрарӑм пурӑннӑ. 1926 ҫулхи ҫыравра 25 килте 64 арҫын, 74 хӗрарӑм пурӑннӑ. 1939 ҫулта 48 арҫын, 62 хӗрарӑм пулнӑ. 1979 ҫулхи ҫыравпа килӗшӳллӗн ялта 23 арҫын, 41 хӗрарӑм шутланнӑ. 2002 ҫулхи ҫырав ялта 19 кил пулнине палӑртнӑ, пурӗ 39 ҫын пурӑннӑ: 21 арҫын, 18 хӗрарӑм.
«Гвардеец» АУО шутне кӗрет.
Тулли верси :: Статья каҫми